啟德1B3用地 - 齊惜福過渡性房屋「啟福居」爭取德朗邨互委會背書

【過渡性房屋:淨係畀你揀支持,都叫做有得揀】


德朗邨1B3中學用地將會撥畀「齊惜福」興建過渡性房屋「啟福居」。近日收到街坊報料,齊惜福交咗份文件畀德朗邨嘅互助委員會,其中一張紙係回條,畀互助會為過渡性房屋背書,內文寫住:德朗邨德X樓互助委員會欣悉上述項目惠澤社區,支持「啟福居」過渡性房屋計畫。


啟德人口不停加,區內中小學反而少咗,然後再整多兩個過渡性房屋畀居民歎,咁樣都叫「惠澤社區」,真係多謝晒。

「齊惜福」過渡性房屋嘅撥款申請喺2月22號批准咗,成件事先斬後奏零諮詢都係預計之中,因為對社區弊多於利嘅設施係唔會有居民支持。硬推完之後先嚟問互委會背書,咁樣做會唔會肉酸咗少少呢?

——————

街坊另外打咗段字,表示區內有人收受利益,出賣街坊。內容我證實唔到,大家自行判斷真偽啦:

收到路透社消息:

關於德朗後面原本係起學校既空地

張景勛一直都講話反對係過渡性房屋

而今次係張景勛契媽德琦樓主席話支持起

事件係由齊惜福(689老婆龍蝦做主席)幫忙既

事緣齊惜福早排捐左200斤西蘭花交比張契媽 等佢比德朗各座既主席派發(唔知有無街坊收過?)聽聞仲派唔晒

咁張契媽收左人野之後就同齊惜福果面講佢地做咩活動

搞咩地區工作都會大大力咁支持~

之後齊惜福果面就聯絡左德朗各座既主席

叫佢地支持過渡性房屋仲同各座主席講

德琦樓主席(張契媽)大大力支持

之後所有德朗既主席就追問張契媽XD

問佢點解要支持起過渡性房屋

某一位主席仲大大力咁問契媽點解要出賣居民~XD...花生何其多..何其精彩

點解齊惜福會有晒各座主席電話?

邊個出賣佢哋??

張景勛果位助理小姐..我知道你都芒緊POST~

估唔到你老闆做一套講一套心又另一套XD

係啵...聽聞助理小姐你好恨想做張太?? 你諗下好LA~~

張議員揀契媽都唔會揀你 XD 照下鏡先唔該

仲要麻銀煩你既語氣態度 客客氣氣 我地的街坊唔係狗黎

唔好呼呼喝喝..唔鍾意做依份工就唔好做

仲有 張生 私樓既街坊都係你既選民.

.淨係理德朗既人唔理私樓昸街坊..係唔係無左契媽幫你

你咩都做唔到~??

——————

簡單補充一吓契媽同張議員嘅關係啦:

張議員嘅選區係「啟德中及南」,包括啟德坊同三棟德朗(德琦、德瑞、德璋),「契媽」就係德琦樓互助委員會主席。2019年區議會選舉張議員憑53.52%得票率險勝(票數1574 vs 1367),德朗樁腳居功至偉。如果冇德朗嘅樁腳幫手,冇契媽嘅「祝福」,呢位契仔仲點贏呢?


契媽個真名我都係喺份聲明先知,求其google個名一吓,佢係一名風水師傅,九龍城分區委員會(啟德)委員、九龍城區防火委員會委員。一棟公屋嘅互助委員會主席可以做到呢啲會嘅成員,同啲區議員、「社會賢達」齊名,都幾唔簡單吓。

契媽同張議員嘅交情係點我唔清楚(亦冇興趣知),不過喺張議員啲「地區工作」相,不難發現契媽嘅身影。用「緊密嘅合作夥伴」形容佢哋都客觀丫。

——————

至於契媽嘅聲明話有人造謠抹黑,要fact check都唔難嘅,搵埋其他當事人對質咪知囉,睇吓齊惜福同其他互委會點講⋯⋯

做人真係要老實、正直,唔好講大話,一講大話就會有穿煲嘅一日。回顧一吓2020年9月區議會會議討論東華三院過渡性房屋,當日啟德三個區議員七情上面,義正辭嚴話反對,要盡快起兩小一中。點知東華三院即場踢爆,原來雙方事前有過摸底會議,仲話有當區區議員支持項目添。

呢班人都唔係第一次出賣街坊㗎啦,唔好咁快就唔記得。

留言