啟德前跑道區可居住人口增長了多少?

 《啟德分區計劃大綱核准圖》修訂咗幾次,前跑道區越嚟越多住宅,咁其實係多咗幾多呢?

用2012年核准嘅版本編號 S/K22/4 做基準,比較一吓現時S/K22/6 (2018年核准),以及諮詢中嘅S/K22/7 (2022年):

喺S/K22/4嗰陣,商業地同住宅地仲係6:6,而且地積比係仲低啲

上面係S/K22/6,住宅用地已經去到11塊,地積比亦顯著增加;下面係S/K22/7,打算剩低嗰三幅商業地都改埋做住宅


三個《大綱》版本嘅住宅樓面面積比較

- S/K22/4,住宅地同商業地各6塊,地積比分別係3同4。
- S/K22/6,新增2塊地4E1同4E2做住宅用地,4A區用地範圍擴闊。用地地積比(PR)亦大幅放寬,變成高密度發展,PR最高放寬到7。住宅地同商業地數量分別係11同3。
- S/K22/7,打算將餘下嘅4B5 4C4 4C5酒店商業地都轉埋住宅。

為咗客觀地表達跑道區人口增長,因此用區內總住宅樓面面積推算。住宅樓面面積 係 地盤面積 乘以 住宅用途地積比。地盤面積採用S/K22/6嘅數值。

- S/K22/4,總住宅樓面面積係大約20萬平方米。(實數係低過20.5萬,因為S/K22/4嘅4A1地盤面積係細啲)
- S/K22/6,總住宅樓面面積係大約70萬平方米,係S/K22/4嘅3.43倍。
- S/K22/7,總住宅樓面面積係大約93萬平方米,係S/K22/4嘅4.51倍。

假設住宅樓面面積係同人口數量成正比,即係人口係原來規劃嘅3至4倍。


「點解用S/K22/4做比較?」

跑道區嘅主要基建,例如現有嘅承豐道同啟德空中花園,係由「啟德發展計劃-前跑道南面發展項目的基礎設施工程(第二期)工程」興建,工程喺2015年11月動工。你睇返年份,呢個工程係基於2012年核准嘅S/K22/4去設計。下個版本S/K22/6係2018年先核准,當時工程已經做咗一半。


「非常質疑跑道區嘅道路基建能否承受咁多人口」

每逢諮詢規劃修訂,份諮詢文件不難見到「有關檢討已進行相關技術評估及考慮規劃、基建、交通及環境等因素。評估結果顯示有關改劃建議在技術上可行。」類似字眼。

2021年11月九龍城區議會文件 - 啟德發展進一步檢討硏究

跑道區人口就嚟加到原有嘅4.5倍,交通基建冇因此改善之餘,環保連接系統(單軌)仲取消埋。區內唯一主要道路 - 雙線承豐道,能被政府技術評估為可以承受倍數增長嘅人口同車流量,呢條路應該係非一般嘅路。難道車輛可以唔行地面,好似飛機咁識得「乘風」翱翔天際?

嚟緊會深入探討承豐道嘅道路規劃,仔細睇吓車流方向、巴士站等設計,有潛質同塞到爆嘅觀塘齊名。

留言