【過渡性房屋嘅開支竟然同興建中小學差唔多？！】
 |
| 啟德區中小學嘅工程開支，同過渡性房屋嘅開支比較 |
沐安街嘅1B2同1B3中小學用地將撥畀東華三院同齊惜福興建過渡性房屋，由政府嘅「支援非政府機構推行過渡性房屋項目的資助計劃」批出撥款。
1B2 東華三院「睦安。共鄰」：2.629億，預計約478個單位，約1200人(與持分者諮詢中)，營運5年
1B3 齊惜福「啟福居」：3.85億，預計700個單位，約1,516人，營運4年
開支係以億計，乜咁貴㗎？咁如果唔起過渡性房屋，起中小學，咁要使幾多錢呢？翻查立法會文件，啟德區內中小學嘅「核准工程計劃預算費」分別係：
- 1A3 聖公會聖十架小學：3億1240萬 (估計每年經常開支: 3140萬)
- 1A4 保良局何壽南小學：3億1750萬 (估計每年經常開支: 3140萬)
- 1A2 文理書院(九龍)：4億4670萬(估計每年經常開支: 5940萬)
就咁睇盤數，一用就幾十年嘅中小學，開支竟然同幾年貨仔嘅過渡性房屋差唔多？齊惜福用4年，開支仲貴過起區內兩間小學？(注意：我意思唔係叫過渡性房屋用耐啲，而係根本唔應該起)
計埋每個單位嘅每月成本，可以睇到過渡性房屋有幾咁唔抵。拎總資助額除以單位數量，
- 東華三院每月每單位開支係：$262900000 / (478 x 60) = $9167
- 齊惜福每月每單位開支係：$385000000 / (700 x 48) = $11458
需注意嘅係，住過渡性房屋係要交租嘅，東華三院曾表示：「每月租金將低於市值租金並訂於住戶可負擔的水平。」當月租3000蚊，條數加埋都$12000起跳。啟德坊私樓嘅租金都係萬幾兩萬，居住環境差一大截嘅過渡性房屋又係萬幾，何來成本效益？拎筆錢直接資助窮人租私樓住唔係仲方便快捷？
資助人租樓住都係隨口講嘅啫，唔係好方法嚟。香港係有屋冇人住，有唔少單位係空置嘅。如果政府肯做租務管制、肯收空置稅嘅話，一定多咗人可以租屋住㗎，仲使乜搞過渡性房屋呢？
留言
張貼留言