上一篇講到前跑道區嘅人口增長，今次會講區內車位喺歷次規劃修訂中嘅供需變化。
由於各樓盤確實嘅伙數同車位數係未知，所以會用已推售嘅維港1號(4B2)嘅數字估算。
維港1號地盤面積約9048平方米，總樓面面積55190平方米(地積比6.1)，共1059伙，159個車位，900伙冇車位。
平均住宅面積 ＝ 55190 ÷ 1059 ＝52.12平方米
平均車位面積 ＝ 9048 ÷ 159 = 56.90平方米
(由於啟德區建築物嘅停車場須建於地庫，住宅地庫停車場通常只設一層，因此用地盤面積比較合理)
 |
| 啟德前跑道區住宅的車位供需估算 |
*推算係假設各項目用維港1號嘅方式興建，實數必然有誤差。如果發展商興建更多細單位，伙數同停車位需求都會增加。
喺現時嘅《啟德分區計劃大綱核准圖》S/K22/6，估計11個住宅項目總共有13551伙，2104個車位。假設1伙1車位，有11446伙冇車位用；如果係S/K22/7，14個住宅項目總共有17815伙，2704個車位。假設1伙1車位，有15112伙冇車位用。
另外，要留意S/K22/4推算嘅唔合理之處。 喺S/K22/6，住宅用地係乙類，規劃意向係「主要是作中等密度的住宅發展」，同啟德坊住宅地同一類別，維港1號高層住宅都1層10伙。然而喺 S/K22/4，住宅用地係丙類，住宅用地(丙類)嘅規劃意向係「主要是作低層、低密度的住宅發展」，估計係想起一層一兩伙嗰種大面積單位，當時規劃嘅車位需求應該係遠低於圖表所計算嘅數值，有機會可以做到1伙1車位。
-----------------
「低密度基建設計，高密度住宅發展」
如果係S/K22/4，假設係大單位低密度發展，當全區得1000伙(3943->1000)，車都係1000架。但係去到S/K22/6-7，車位數量估計去到2100/2700。當個個住戶「好乖」，有車位先揸車，車流量都起碼升咗一倍。承豐道係咪承受到多咗嘅車流？
即使可以1伙1車位，解決車位問題。樽頸位就會轉移到住宅外嘅道路。承豐道表面上係一條雙線雙程嘅馬路，實質上係一條闊啲嘅掘頭路，承受車流嘅能力比一般嘅雙線雙程道路更低。
「跑道區點會冇違泊？」
買得起跑道區嘅人，又點會冇錢揸車？只係有錢都未必買到車位。跑道區位置偏遠，交通差，揸車嘅意欲就更高。當啟德坊咁近地鐵站都違泊到咁，跑道區違泊情況一定更惡劣。
「跑道區冇公眾停車場用」
有公德心嘅啟德街坊，如果屋苑冇車位，都仲可以揀泊麗晶商場、宏天爛地停車場。不過跑道區現時就只有郵輪碼頭嘅停車場，仲要唔畀泊過夜，旅遊中樞有排都未起，其實跑道區即係冇停車場嘅選擇。如果要走到去九龍灣先有位泊，咁仲有咩意義呢？
「跑道區嘅定位係幾尷尬」
跑道區個海景係正嘅，景觀都開揚，有潛質做超級豪宅，賣3-4萬呎甚至更貴都正常。不過一放寬發展密度就出事，個「feel」有啲似鬧市嗰種嘅高密度，好似將啟德坊複製貼上咁，而唔係本來想像嗰種遠離煩囂自成一角嘅豪宅。然而環保連接系統(單軌)取消，車位又唔夠，承豐道好大機會塞車⋯⋯當出行都有困難，咁嘅生活又有幾值得嚮往呢？
留言
張貼留言